он
 
   

Vнэ, тариф  |  Хязгаарлалттай ТХ шалгах  |  Хүчингүй бичиг баримт  |  Арал солих  |  Жуулчин тээвэрлэлтийн зөвшөөрөл  |  Ослын дүгнэлт  |  Нэмэлт төхөөрөмж суурилуулах  |  Хийцийн өөрчлөлт  |  Техникийн хяналтын үзлэг


Д.МӨНХГЭРЭЛ: СЭТГЭЛ ХАНАМЖИЙН СУДАЛГААГ ҮЙЛ АЖИЛЛАГААНЫ ТӨЛӨВЛӨГӨӨТЭЙ УЯЛДУУЛАХ ШААРДЛАГАТАЙ

Mon, 30 Apr 2018

 

“Автотээврийн үндэсний төв” ТӨҮГ-аас хэрэглэгчид болон ажилчдын сэтгэл ханамжийн судалгаа авч, хийж хэрэгжүүлж байгаа үйл ажиллагаандаа үнэлэлт дүгнэлт өгчээ. Судалгаа, хөгжил чанарын удирдлагын төвийн мэргэжилтэн Д.Мөнхгэрэлээс энэхүү судалгааны ажлын талаар цөөн зүйлийг тодрууллаа.

- Байгууллагын талаарх сэтгэл ханамжийн судалгааг явуулах нь ямар давуу талтай вэ. Танай байгууллагатай холбоотой санал, шүүмж багагүй яригддаг. Судалгааныхаа талаар танилцуулна уу?

-Уг сэтгэл ханамжийн судалгааг явуулснаар хэрэглэгчдээс бидэнд илгээх санал хүсэлтийг олж мэдэх, тав тухтай үйлчилгээг үзүүлэхэд юун дээр түлхүү анхаарах ёстой зэргийг тодорхойлоход чухал үр нөлөөтэй. Мөн 2018 оныг "Үйлчилгээний чанарыг сайжруулах жил" болгон зарласантай холбогдуулан үйлдвэрийн газрын хэмжээнд хэрэглэгчдэд үзүүлж буй үйлчилгээг хэрхэн чанаржуулах вэ гэдэг асуултад хариулт олох шаардлага тулгарсан.

Уг судалгааг тээврийн хэрэгслийн бүртгэл, шилжилт хөдөлгөөний үйлчилгээ үзүүлж буй 3 төв, зорчигч тээврийн үйлчилгээ үзүүлж буй 2 төв, техникийн хяналтын үзлэгийн үйлчилгээ үзүүлж буй 3 төв, мэргэшсэн жолоочийн шалгалтын төвүүдээс тус бүрд нь асуулгын аргаар явуулсан. Нийт 940 хэрэглэгч, 181 ажилтан албан хаагчдаас судалгааг авсан. “АТҮТ” ТӨҮГ-ын ажилчдын сэтгэл ханамжийн судалгааг өмнө нь авч байсан арга зүйг өөрчлөн онлайн хэлбэрээр явуулснаараа энэ жилийн судалгаа онцлогтой байлаа. Уг судалгааны тайланг “АТҮТ” ТӨҮГ-ын нэгдүгээр улирлын тайлангын хурлаар нийт ажилчдад танилцуулсан.

- Судалгаанд ямар хүмүүс хамрагдаж хэрхэн үнэлгээ өгсөн бэ?

-2018 оны 02 сарын 06-ны өдрөөс 02 сарын 28-ны өдөр хүртэл 22 хоногийн туршид хийж гүйцэтгэсэн бөгөөд төв тус бүрд өөрсдийн биеэр очиж, анкет бөглүүлэх буюу ярилцах зарчмаар судалгааг авсан. Хэрэглэгчид бидний үзүүлж буй үйлчилгээнд тааламжтай хандаж байсан ба цаашид авч хэрэгжүүлэх шаардлагатай, анхаарвал зохистой асуудал болон ажлуудыг санал болгож байсан  юм. Уг судалгаанд түүврийн аргыг ашигласан бөгөөд оюутан, өндөр настан, хувиараа хөдөлмөр эрхлэгч, төрийн байгууллагын албан хаагч зэрэг төрөл бүрийн хэрэглэгчид хамрагдсан. Зорчигч үйлчилгээний төвүүдэд судалгаа хийх явцдаа бидний шинээр нэвтрүүлсэн үйлчилгээ болон тус төвүүдийн үйлчилгээний чанар, тав тухад үнэлгээ өөрсдийн үнэлгээг өгсөн байгаа. Онлайн тасалбар захиалга болон тээш хадгалах, хүлээн авах үйлчилгээний талаар хэрэглэгчид мэдээлэл дутмаг байгаа нь ажиглагдсан. Бид уг үйлчилгээг хэрэглэгчдэд таниулах, сурталчлах, хөгжүүлэх арга хэмжээ авч ажиллах шаардлагатай байгааг эндээс харж болно.

-Цаашид үйл ажиллагаандаа анхаарах тулгамдаж байгаа ямар асуудал байв?

-Тээврийн хэрэгслийн бүртгэл, шилжилт хөдөлгөөний үйлчилгээ үзүүлж буй төвүүдэд оочер дарааллын асуудал нэлээдгүй хөндөгдөж байсан. Цаашид уг үйл ажиллагаанд ажилтан албан хаагчдын тоог нэмэгдүүлэх, үйлчилгээг цахим хэлбэрт шилжүүлэх талаар манай байгууллагаас анхаарч ажиллаж байна. Техникийн хяналтын үзлэгийн төвүүдийн үйл ажиллагаа хэрэглэгчдээс хамгийн өндөр үнэлгээг авсан. Инженер техникийн ажилтнуудын ур чадвар, заавар зөвлөгөө өгөх чадвар нь өндрөөр үнэлэгдэж, үйлчилгээний чанарын үзүүлэлтээр тэргүүлээд байна. Мэргэшсэн жолоочийн шалгалт авах төвөөр үйлчлүүлэгчид нь шалгалтаа өгөхдөө долоо хоногийн ажлын өдрүүдэд хүссэн цагтаа очиж онлайн хэлбэрээр шалгалтаа өгдөг байдал нь хэрэглэгчдэд ихээхэн таалагдаж байсан.

-Хэрэглэгчдээс гадна байгууллагын албан хаагчдын дунд дотооддоо санал асуулга явуулсан гэсэн. Үр дүн нь юу байв?

-Үйлдвэрийн газрын ажилтан албан хаагчдын сэтгэл ханамжийн судалгаа нь үндсэн 3 хэсгээс бүтнэ. Үүнд: “АТҮТ” ТӨҮГ-ын Захирлын арга барилын талаар, Хүний нөөцийн бодлогын чиглэлээр болон нээлттэй санал хүсэлтийн хэсгүүд хамаарна. Ажилтан албан хаагчид нь тус үйлдвэрийн газрын Захирал П.Дэлгэрнаранд уг судалгаагаар дамжуулж өөрсдийн санал хүсэлтийг ирүүлсэн бөгөөд удирдах арга барил, шинэ санал санаачлагыг дэмжих тал дээр маш сайн үнэлгээг аваад байна. Ажилчдын сэтгэл ханамжийн судалгаагаар ирсэн санал, хүсэлтүүд нь хүний нөөцийн бодлогын чиглэлээр, удирдлагад уламжлах санал хэлбэрээр, сургалт хүний нөөцийн чиглэлээр, нийгмийн халамж, цалингийн асуудлаар, ажлын байрны орчин нөхцөлийн асуудлаар  тус тус хандсан байв. Цаашид “АТҮТ” ТӨҮГ нь эдгээр сэтгэл ханамжийн судалгаа дээр үндэслэж үйл ажиллагааны төлөвлөгөө боловсруулж ажиллахаар болоод байна.

-Хэрэглэгчдээс авсан судалгааг нэгтгээд үзвэл танай байгууллагын үйл ажиллагаа хангалттай түвшинд ажиллаж чадаж байна уу?

-Хэрэглэгчдийн судалгааны үр дүнгээс харахад нийт судалгаанд хамрагдсан 940 хэрэглэгчээс  668 буюу 71% нь “Сайн”, 252 буюу 27% нь “Дунд”, 20 буюу 2% нь “Муу” гэсэн үнэлгээг тус тус өгсөн байна. Цаашид үйлчлүүлэгчийн сэтгэл ханамжийн судалгааг тогтмол хийж хангалтгүй үнэлгээ авсан үйл ажиллагааны чиглэлээр тухай бүр тодорхой төлөвлөгөө гаргаж үйлчилгээний чанарыг байнга сайжруулж ажиллах  шаардлагатай байна.

-Байгууллагынхаа цаашдын хөгжлийг хэрхэн тодорхойлж харж байна вэ?

-Залуу боловсон хүчний хувьд уг судалгааг хийж гүйцэтгэх 22 хоногт тус үйлдвэрийн газрын хэрэглэгчидтэй харьцдаг бүхий л чиглэлд өөрийн биеэр очиж ажиллаж үзсэн. Тухайн үед байгууллагынхаа үйл ажиллагаагаар, ажилтан албан хаагчдынхаа ур чадвараар бахархах сэтгэгдэл төрж, цаашид бид бүхний үзүүлж буй үйлчилгээ ард иргэдэд ямар үр өгөөжтэй байх, цаашлаад хэрхэн үйл ажиллагаатай уялдуулах боломжтойг судалж байна. Улсын хэмжээнд хаалганаас хаалганд хүргэх боломжтой цор ганц тээврийн төрөл болох автотээврийн салбар маань улам илүү өргөжин тэлж, ард иргэдийнхээ хүссэн үйлчилгээг цаг алдалгүй үзүүлэх чадамж бидэнд байгааг олж харлаа. Зохион байгуулалт болон менежментийн тал дээр зоримог шийдвэрүүдийг гаргаж чадвал ойрын хугацаанд энэхүү зорилгод хүрэх нь гарцаагүй гэж харж байна.

 

 


[ « Буцах | Хуудасны эхэнд | Хэвлэх | Дараах » ]
Холбоо барих

Хаяг: Улаанбаатар хот, Сүхбаатар дүүрэг, Чингисийн өргөн чөлөө, Автотээврийн Үндэсний Төв
Утас: 1900-1234
Факс: 70112851

И-мэйл: info@transdep.mn


250671






Нvvр хуудас | Цахим шуудан | Салбаруудын байршил | Холбоо барих | Хэвлэх | Вэбээс гарах

2018 © Автотээврийн Үндэсний Төв. Зохиогчийн эрх хуулиар хамгаалагдсан.